Wenn dat na den Geburtsoort geiht, denn bün ick een Bayer, wiel dat ick 1937 in München op de Welt kamen bün. 
Man so’n waschechten Bayer bün ick nich. Mien Öllern weern Norddüütsche. Ick bün ook nich katholsch, heff keen Ledderbüx, kann nich jodeln, un wenn Zenzi un Hias ut Oberbayern an’t Brabbeln sünd, verstah ick nix.

Plattdüütsch dorgegen is sowat as mien Moderspraak. Ick bün as lütte Bubi in den Kreis Sebarg (Kreis Segeberg) kamen un dor mank Plattdüütsche opwussen. Mien Leven lang heff ick op’n Lann in holsteensche Dörper leevt un ümmer veel un geern Plattdüütsch snackt un vertellt.

Mit 21 Johren wörr ick de eenzige Schoolmeister vun een ganz lütt Dörpsschool. As denn in de sösstiger Johren de lütten Schoolen dichtmaakt wörrn, bün ick de Rekter vun een grote School worrn un dat 23 Johr lang bleven.

Nu leev ick mit mien Fru tosamen in Schönberg in’n Kreis Herzogtum Lauenburg.
____________________________________________________________

Ick schriev gern Geschichten op Plattdüütsch,
Plattdüütsch so as dat in Holsteen snackt warrt.
Af un an kümmt dor ook maal een Gedicht bi rut.

Wo ümmer ick welk vun mien Vertellen vördragen heff,  ümmer sünd achterna nette Lüüd op mi tokamen un hebbt fraagt:
Kann ick den Text wull hebben?
Könen Se mi dat kopieren?
Woneem finn ick dat?

Do heff ick „oprüst".
Ick bün bikamen un heff to Huus - tosamen mit mien Fru - bitlang 
veer Böker maakt, un veer Hörböker op CD. 
Wi stellt se hier vör. 
Kann angahn, wi maakt noch mehr.